شوية غلطات خلي بالك منهم وأنت بتعمل البحث.
انت يابني ياللي قاعد تختار زمايلك من برا المدرسة. مش فرح هو. لازم المجموعة من نفس المدرسة ومش لازم نفس الفصل.
.
وانت يا حبيبي ياللي قاعد تألف عناصر من دماغك.
انت مطلوب منك تجاوب على الاربع عناصر اللي تحت كل موضوع زي اللي في الصورة. مش ماجستير هو.
.
وانتي يا حاجة ياللي بتقولي هنكتب في ورق نوعه ايه.
مش ورق عنب هو. اكتبي في اي ورق
.
وانت ياللي بتقولي هو البحث كل مادة لوحدها.
حبيبي البحث ٤ اسئلة (٤عناصر) هتجاوبهم في ورقة وخلصنا الليلة خلاص.
.
مستر هو البحث كم ورقة
كم ورقة ايه البحث كله ٧٠ كلمة مقدمة و ٨٠٠ كلمة الموضوع كله اللي هو إجابة العناصر وخلاص اتعشت كدا.
.
مستر انا نزلت القوالب الجاهزة عشان اكتب فيها لكن مش عارف.
افهم . القوالب دي عشان تشوفها بس وتعمل زيها. بالورقة والقلم. ثم انها مكتوبة pdf ودي برنامجها صعب تستخدمه.
اكتب ياخويا بالورقة والقلم وصوره .
.
وأنت بتعمل إيه؟
انا بفتح موقع ادمودو عشان اسجل عليه
قوم دلوقتي اعمل البحث الأول وبعدين دور عالتسجيل بعد يوم ١٣ ابريل. لحد مالوزير يفهمنا.
.
وانت بتعيط ليه
يامستر في المدرسة قالوا مفيش كود صف.
قولتلك ركز فقط على كودك انت بس دلوقتي.
.
الحقني يا مستر مش لاقي الإجابات على المكتبة الرقمية
عادي ما تروح تبحث في الحاج جوجل. هي خلاص حبكت يعني
.
وانتوا يا بنات بتعيطوا ليه
عشان مفيش غيرنا احنا الاتنين ومش عارفين نكمل ٥.
وايه يعني . ينفع ٢ و ٣ و ٤ و ٥
بس بلاش اكتر من ٥ مش حنة بنت عمتك هي.
.
مستر هو ٧٠ كلمة دول المقدمة ولا النتائج
المقدمة يا حبيبي إنما النتائج دي يعني استفدت ايه او طلعت با ايه من البحث بتاعك.
.
مستر سؤال لولبي شوية. ازاي ادخل العلوم والرياضيات والانجليزي في بحث واحد.
.
البحث متقسم ٤ عناصر. كل عنصر بيسألك سؤال من مادة مختلفة. سؤال عن العلوم و سؤال عن الدراسات وهكذا.
.
انا بقى يا مستر لغات.
احل عناصر الساينس والماث بالانجلش ولا بالعربي.
ياخي كدا ينفع وكدا ينفع بصوت الفنانة يسرا
وانتوا رايحين فين؟
رايحين السايبر نكتب البحث عالكمبيوتر و نلعب شوية بالمرة.
روح على بيتك منك له. اكتب البحث بقلمك وصوره بالموبايل و خد الصور حطها في برنامج word وانتهينا. ولو معرفتش خلي حد يعملهم. ولو حبكت سايبر اديله الصور و هو يعملهالك.
.
مستر انا رايح اشتري فلاشة عشان انزل البحث عليها واسلمها للمدرسة.
فلاشة ايه بس. الفلاشة ب ١٥٠ جنيه. هات أسطوانة ب ٣ جنيه وخلاص و اكتب اسمك عليها. يا اما تستنى ليوم ١٣ أبريل ونقولك عالطريقة التسليم بدون الذهاب للمدرسة.
.
يللا اشتغلوا. ولو ان الأفضل تنتظروا اسبوع وبعدين تشتغلوا. سلام
منقول